旅遊熱愛狂
旅遊網站 情報 優惠 特別 促銷 機票 酒店 套票 旅行團 郵輪 Travelholic.hk

全球首間薯蛋頭先生CAFÉ

0 201

《反斗奇兵》啲玩具出動,通常都係去搵返個老友。最近薯蛋頭先生(Mr. Potato Head)親身嚟到香港,不過佢唔係唔見咗胡迪、巴斯,而係唔見咗太太吖﹗太太當然鍾意煮嘢食,原來薯蛋頭太太走咗去,係去學煮咖喱,所以去到Izumi Curry拜師,做出多款薯蛋頭造型嘢食,似模似樣,一睇就知佢好掛住薯蛋頭啦﹗

text-william photo-william

影到飽﹗薯蛋頭充斥每個角落

Izumi Curry為迎接薯蛋頭嘅大駕光臨,將屯門V City同尖沙咀Mira Mall分店改裝成Mr. Potato Head Café,到處都有薯蛋頭嘅嘜頭作布置,唔少裝飾更用到經常散落一地嘅薯蛋頭眼耳口鼻,非常趣怪。而每檯都會擺放由日本直送嘅薯蛋頭夫婦公仔,等大家食飯時可以同佢哋selfie到飽。

薯蛋頭會親自出嚟招呼客人,7月4日喺屯門V City,7月11-12日都喺屯門V City,跟住7月18-19日會過去尖沙咀Mira Mall,大家想捕獲佢嘅話就自己睇定日子喇﹗

薯蛋頭知道自己好忙,又煮咖喱又招呼客人,所以派咗由日本直送嘅薯蛋頭公仔陪食陪坐陪selfie!

都話薯蛋頭啲五官周圍跌,成牆都係。

牆上嘅裝飾都好有趣,薯蛋頭嘅眼耳手等跌咗落啲食物度,勁得意。再睇埋個燈罩,靚到嘩一聲。

餐墊都係得意薯蛋頭,我唔想整污糟喎。

店外擺放咗1.5米高嘅薯蛋頭先生同蛋頭太太模型,重要係廚師造型,好鬼sweet。

DIY薯蛋頭熱香餅最有feel

Café提供嘅薯蛋頭美食,當然有番薯蛋頭拼砌眼耳口鼻嘅特色,用蔬菜、火腿等做成薯蛋頭嘅眼鼻耳,再放喺咖哩飯或薯餅上,見到嗰下,好想將佢哋重新拼砌,整個唔同樣嘅薯蛋頭出嚟。好似我哋咁手多嘅話,一定要點朱古力醬熱香餅,薯仔形嘅熱香餅上乜都冇,就等你用朱古力醬畫上薯蛋頭樣貌,最有薯蛋頭公仔拼砌嘅玩法。

吉列豬扒飯(可選咖哩汁或日式燒汁)$129 識得食梗係食IZUMI CURRY最出名嘅吉列豬扒飯,但變薯蛋頭個樣我點捨得食呀!

_ROV9827A

巨型漢堡薯角套餐 $99 如果唔係薯蛋頭,我哋又點可以喺日式咖喱店搵到美式地道漢堡包同薯角?為咗感恩,我哋梗係要同佢selfie個夠。

自家製原味蛋糕 $69 甜品梗係唔少得,呢個薯蛋頭造型好到位,重有朱古力口味添。

朱古力醬熱香餅配橙汁 $69 餐廳必食嘅首推熱香餅,可以俾你用朱古力醬自己DIY 唧薯蛋頭個樣,邊玩邊食,堅有趣!

未入餐廳先興奮,因為有一大排獨家紀念品,好多喺出面都冇得賣。

新店開幕,薯蛋頭已經準備好一系列嘅紀念品派街坊,好似呢個襟章,點先拎到?上Izumi Curry facbook專頁咪知囉。

薯蛋頭同薯蛋頭太太公仔  凡惠顧餐廳消費滿$200或以上,即可獲得印花一個。集滿10個印花即可換購公仔1個。

Izumi Curry限定版薯蛋頭Tee 售價待定

日本直送嘅薯蛋頭公仔每檯都有,食嘢時小心啲,唔好整污糟。

_ROV9791A

薯蛋頭iphone6手電套 $298

Izumi Curry x Mr. Potato Head Cafe

地址:屯門屯門鄉事會路83號V City商場1樓9號鋪

電話:2392 6222

營業時間:11:30am-10:00pm

 

地址:尖沙咀彌敦道118號Mira Mall 1樓110號鋪 (即美麗華商場對面)

電話:3104 1904

營業時間:11:30am-10:00pm

 

原文:http://www.nmplus.hk/home/全球首間薯蛋頭先生cafe-你忍心將可愛薯蛋頭食落肚/