台灣美食: 嚴選台灣最好飲珍珠奶茶

By 心程旅遊 Stravel On 10 月 20, 2015

台灣美食: 如果牛肉麵係去台灣必食，咁珍珠奶茶就一定係去台灣必飲！台式飲料店喺台灣成行成市，點先可以一擊即中，揀中最好飲嘅珍珠奶茶呢? 綜合台灣網站openrice同ettoday，好飲嘅珍奶遍佈台灣東南西北，即刻睇吓啦!

1. 迷客夏 (連鎖)

迷客夏採用綠光牧場嘅鮮牛奶作原材料，香醇濃郁。最特別嘅係白珍珠，咬起來口感更Q，配上以新鮮茶葉沖泡嘅奶茶，真材實料有保證。
2. 端倪生活

端倪生活係一間由老屋翻新而成嘅 Cafe ，vintage風吸引好多文青嚟朝聖架，當然，佢嘅珍珠奶茶都唔弱啦! 招牌飲品有黑糖珍珠鮮奶同白玉抹茶鮮奶。

地址：彰化市三民路9號

3. 春水堂 (連鎖)

好飲嘅珍珠奶茶代表當然唔少得始祖春水堂啦! 春水堂堅持使用低溫配送嘅珍珠，確保新鮮。加上奶同原汁茶，每杯奶茶嘅玻璃杯上都浮著一層細緻泡沫，泡沫融合咗茶香同奶香，連同碎冰一齊入口，瞬間係口中融化，滋味歷久常新。

4. 翰林茶館 (連鎖)

翰林茶館以純正古法製作的黑、白珍珠，口感滑溜彈牙。特別係熊貓珍奶，將黑珍珠與白珍珠混合埋一齊，雙重滋味，雙重享受。

5. 茶藝復興

茶藝復興強調唔加冰，飲品係以專門機器急速冷凍，Q彈嘅珍珠配上進口斯里蘭卡紅茶，保留原始風味。

地址: 高雄市鼓山區麗雄街48號

6. 十杯

十杯最吸引人之處就係引進無乳糖鮮奶，讓受乳糖不耐症困擾嘅朋友們都可以無憂無慮咁嘆返杯珍珠奶茶，超貼心!

地址: 新北市永和區中正路486號

7. 廖媽媽珍珠奶茶專賣鋪

廖媽媽珍珠奶茶專賣鋪SELL嘅係集體回憶！細小嘅店面喺放學時候總係擠得水洩不通，早前嘅塑化劑風波，廖媽媽依然位列安全名單，可以話係守護學生嘅好媽媽!

地址: 基隆市孝三路84號2樓

8. 陳三鼎

陳三鼎嘅青蛙撞奶喺台北公館地區可謂無人不曉，以黑糖熬煮嘅珍珠Q度剛好，散發住陣陣黑糖香氣，配上鮮奶中和珍珠的甜度更是順口。

地址: 台北市中正區羅斯福路三段316巷8弄口

9. 郭姐茶坊

喺台南營業咗20多年嘅郭姐茶坊喺5月中遷至台中，造成唔小轟動，甚至要排隊5個鐘先買到。招牌飲品係無糖鮮乳波霸，以黑糖熬煮珍珠，再加入香濃美國鮮奶，完全無加一滴水，原汁原味。

地址: 台中市臺灣大道三段

10. Queenny葵米。珍珠飲品專售

以拖肥糖熬煮白玉珍珠，及以台灣黑糖、紅糖熬煮嘅焦糖珍珠，同普通嘅珍珠比起特別多。配上紅茶或烏龍茶，呈現出淡雅不甜膩嘅滋味。

地址: 台南市中西區慶中街196號

11. 樺達奶茶 (連鎖)

喺高雄地區有多間分店嘅樺達奶茶，堅持不用封膜、不加冰塊，無得揀甜度，所以選茶等於選甜度。招牌樺達奶茶較甜，香醇濃茶同奶香恰到好處，喝起來十分順口。