宜蘭民宿: 秘穴行館 – 地中海feel民宿

By 心程旅遊 Stravel On 8 月 8, 2015

宜蘭民宿：原本以為宜蘭係一個鄉郊地方，民宿多數都係走親民路線，真係發夢都估唔到呢度竟然可以搵到間咁靚嘅民宿，散發住地中海feel~

秘穴行館係繼伯朗城堡後，令我地再次以為自己身處歐洲嘅一個地方! 民宿座落於宜蘭頭城嘅海岸線上，外觀仿照每個女孩子都夢寐以求嘅希臘深藍屋頂白色小屋興建，每間房都有獨立露台，一望出去仲要180度全海景…唔講真係以為自己去左希臘santorini呀! 民宿每間房都設有獨立出入秘道，啱晒最著重私隱嘅客人。

入房一睇，果然「民」如其名，好似成個秘密洞穴咁。民宿主人仲好有心思咁幫每間房改名，好似: 邱比特、雅典娜、維納斯咁…唔知住完一晚雅典娜房後會唔會變到好似呢個希臘女神咁有氣質呢? (自我陶醉中…) 房間每件擺設都係由民宿主人親自喺歐洲搜集返黎，原來民宿主人為左同多啲人分享同欣賞到佢嘅古董收藏品，先將呢間海邊別墅發展成民宿~ 呢個武士會唔會好似Night at the Museum咁半夜翻生架?人有三急，入到浴室，嘩嘩嘩!!! 個浴室大到可以開party呀! 浴缸仲大到可以點瞓都得添!由秘穴行館行落去沙灘只需短短3分鐘，除咗喺房間個小型pool玩水外，嚟海灘一樣得！一場黎到，緊係要對住太平洋睇日出啦! 再黎個晨光一跳，有無feel先 ?
返入民宿望住個海歎返個專人烹調嘅English Breakfast，生活品味咪就係咁囉～! 想玩得盡興d，仲可以叫民宿主人幫你代訂各種活動，浮潛、滑翔傘、衝浪等等應有盡有。加埋專業教練陪同指導，咁就玩得安心又放心啦! 台灣價錢，希臘享受…唔想坐十幾個鐘頭飛去愛琴海? 不如近近地過來宜蘭黎番個地中海式度假先啦~