宜蘭遊記：樂山溫泉拉麵 / 蘭陽博物館 / 伯朗城堡

宜蘭遊記：一大早嚟到宜蘭礁溪，今朝食嘅早餐已經落晒膈，再加上行到攰攰地，最啱就係去樂山溫泉拉麵祭祭五臟廟喇!

點解咁講? 因為店內分成泡腳區和單吃區，客人可以一邊食拉麵一邊浸腳! 最啱又肚餓又攰嘅旅客去補充energy~

甫入店內，已感受到陣陣日式風情。日式風格的佈置，加上以拉麵和丼飯為主的 menu，ichiban!

一場嚟到就緊係要泡返個美人足湯啦 – 礁溪溫泉含豐富礦物質包括鈉、鎂、鈣、鉀、碳酸離子等，浸泡後有益身體健康，洗後光滑柔細不黏膩，因此被譽為「美人湯」。話時話，我地都覺得浸完之後皮膚滑咗~哈哈!

浸完食飽完當堂精神為之一陣，又係時候去下個check point喇! Let’s go!

地址：宜蘭縣礁溪鄉公園路20號

距離check in民宿前仲有啲時間，我地決定做偽文青，到蘭陽博物館參觀一下。一嚟到，就比博物館嘅三角建築造型吸引住。

邊行邊search資料，發現建築師係以台灣東北角嘅「單面山」做靈感，融入旁邊烏石礁濕地嘅景色，令全景好似有山有水一樣，可惜當日天氣麻麻，如果唔係影出嚟嘅相一定仲靚~

博物館總共有４層，展出宜蘭由地理環境至人文生活嘅發展。

睇嚟文青生活都係唔係好適合我地兩個，行行下博物館，見到出面有座好似城堡嘅建築物，就忍唔住走咗出去喇 (掩面)~原來佢就係大名鼎鼎嘅伯朗城堡。

地址：宜蘭縣頭城鎮青雲路三段750號

伯朗城堡其實就係伯朗咖啡(Mr Brown)開嘅特色咖啡店，成座歐式古堡被一片大草地襯托住，入面仲有條旋轉樓。沿旋轉樓梯走到上層，發現有座風車，唔講真係以為去左歐洲呀!

城堡上層仲可以眺望住龜山島、烏石港同蘭陽濕地等靚景，難怪成為拍拖勝地啦!

不過，首先你要有個男/女朋友……………諗起都灰灰地，好彩有得嘆返杯咖啡同食件cake，心情即刻靚晒～玩多陣，係時候去民宿check in 喇!

p.s. 希望下次去宜蘭會有另一半喺身邊啦~

地址：宜蘭縣頭城鎮外澳里8鄰石空路95號